Бишкекте Ататүрк сейил багындагы маселе боюнча жыйын өттү

Бишкек шаарынын мэриясында Ататүрк сейил багынын аймагында жайгашкан объектилердин маселеси боюнча мекемелер аралык жыйын өттү.

Калаа мэриясынан кабарлагандай, жыйын мэр Айбек Жунушалиев, Архитектура, курулуш жана турак жай-коммуналдык чарба мамлекеттик агенттигинин директору Нурдан Орунтаевдин жана тиешелүү кызматтардын жетекчилеринин катышуусунда өттү.

"Парктын аймагындагы объекттерди демонтаждоо жана бузуу иштери 20-майга пландаштырылган. Ведомстволор аралык кеңешменин жыйынтыгы боюнча борбор калаанын башчысы тиешелүү кызматтардын жетекчилерине сот органдарына доо арыз менен кайрылууну, Ататүрк паркынын аймагын Бишкек шаардык мамлекеттик администрациясынын 1992-жылдын 25-июнундагы №225 токтому менен бекитилген чек аралардагы парктын жер участокторун кайтаруу иштерине даярдоо боюнча чараларды көрүүнү тапшырды", - деп айтылат маалыматта.

Эске салак, 12-апрелде калаа башчысы Айбек Жунушалиев Бишкек шаардык мамлекеттик администрациясынын 1992-жылы бекитилген 107 гектар Ататүрк атындагы сейил бактын чек араларын бекитүү боюнча токтомго кол койгон. Ага ылайык, мурда курулушка бөлүнгөн 43 гектар жер парктын аймагына кайтарылышы керек.