Жекшембиде Израилдин аскерлери мусулмандардын оккупацияланган Чыгыш Иерусалимдеги Аль-Акса мечитине айт намазга келүүсүнө бөгөт койду.
Жүздөгөн кишилердин сыйынуучу жайга кирүүсүнө көзөмөл бекети аркылуу бөгөт коюлуп, айрымдарын Израилдин коопсуздук күчтөрү түртүп, союл менен сабашкан.
7-октябрдан бери Израил бийлиги мусулмандардын Иерусалим мечитине кирүүсүнө чектөөлөрдү күчөтүп, ичине кирүүчүлөрдүн санын кескин чектеди.
Согуш жүрүп жаткан Газада палестиналыктар айт намазын кыйраган үйлөрдүн жана мечиттердин урандыларынын жанында окушту.
Израилдин курчоого алынган Газадагы согушуна 8 ай болду. Үйлөрдүн жана мечиттердин көбү талкаланып, болжол менен 365 чарчы чакырым аянтты кыйратты.
Газа өкмөтүнүн маалыматы боюнча, 800дөн ашуун мечит жабыркап, анын 600ү толугу менен талкаланган. Алардын арасында Газанын эң байыркы мечити болгон Эски шаардагы Улуу Омари мечити да бар, ал дээрлик 700 жыл мурун курулган.
БУУнун спутниктик борбору талдаган спутниктен алынган сүрөттөргө ылайык, жалпысынан Израилдин бомбалоосу 137 миңден ашуун имаратты кыйратты, бул Газа тилкесиндеги бардык имараттардын жарымынан көбү.
БУУнун Палестиналык качкындар боюнча агенттиги (UNRWA) Газадагы кыйроону сөз менен айтууга мүмкүн эмес экенин жана урандыларды тазалоо жылдарга созуларын билдирди.