Эмгек министрлиги чет өлкөдө жумушка орноштурган компаниянын ишин токтотту

Жарандарды чет өлкөдө ишке орноштуруу борбору "Евро Хантер Компани" ЖЧКсынын иши токтотулду. Бул тууралуу Эмгек, социалдык камсыздоо жана миграция министрлиги билдирди.

Маалыматка ылайык, мындай чечим компаниянын кызмат көрсөтүүсүн көпкө күтүү боюнча жарандардан түшкөн даттануулардан улам кабыл алынган.

"Евро Хантер Компани " ЖЧКсы "жарандарды чет өлкөлөрдө ишке орноштуруу боюнча ишмердүүлүктү жүзөгө ашыруу тартиби жөнүндө" жобонун нормаларын бузган", - деп айтылат маалыматта.

Министрлик түзүлгөн кырдаалды жөнгө салуу үчүн компанияга төмөнкү талаптарды койгон:

учурдагы маселелер чечилмейинче жана катталган кардарлардын алдындагы милдеттенмелер аткарылмайынча жаңы талапкерлерди тартууну токтотуу;
кызмат көрсөтүүнү көптөн бери күтүп жаткан бардык жарандарга акча каражаттарын кайтарып берүү.

Ошондой эле министрлик ушундай көйгөйлөргө туш болгондорду кайрылууга чакырды.

Автор: Кылымбек Бейшеев
Фото: Эмгек министрлиги