Асел Ногойбаеванын мурдагы күйөөсү абактан кат жазды

Кулак-мурду кесилген Асел Ногойбаева мурдагы күйөөсү Азамат Эстебесов абактан билдирүү жөнөтүп жатканын Instagram баракчасы аркылуу билдирип, ал жазган каттарды жүктөдү.

"Катуу режимде жатат имиш! Качып чыгып кетиш мен үчүн оңой дейт. Номерди алмаштырсам дагы коркутуулар таң атпай кайра келип баштады", - деп жазды ал.

Ал эми мурунку күйөөсү жөнөткөн билдирүүлөрдө ал абактан чет өлкөгө качып кете алары жана өлкөгө кайра кайтып келе алары айтылат.

Эске салсак, былтыр 20-сентябрда Бишкектин четиндеги Селекция айылында 36 жаштагы Асел Ногойбаеваны мурдагы күйөөсү мыкаачылык менен бычактап, келин ооруканага түшкөн. Милиция мурдагы аялын бычактоого шектелген 39 жаштагы жаранды кармаган. Шектүү аялынын мурдун, кулактарын кесип салган.

26-январда Чүйдүн Сокулук райондук соту Азамат Эстебесовду коюлган 11 айыптын ичинен 10 айып боюнча күнөөлүү деп таап, 20 жылга эркинен ажыраткан.

Автор: Кылымбек Бейшеев
Фото: Асел Ногойбаева