Бишкек мэриясы шаардын борборундагы оңдоодон өтүп жаткан көчөлөр качан ачылары тууралуу маалымат берди.
Мэриянын маалыматына ылайык,
20-августка чейин Ахунбаев көчөсүн Манас проспектисинен Жукеев-Пудовкин көчөсүнө чейин, ошондой эле Абдрахманов көчөсүн Аалы Токомбаевден Жибек Жолуна чейин бүтүрүүнү пландап жатышат.
18-июлда Чүй проспектиси Манас проспектисинен Төрөкул Айтматовго чейинки бөлүгүн жарым-жартылай жабуу менен иш башталып, ишти 20-сентябрга чейин бүтүрүү пландалууда.
Жибек Жолу проспектиси Тоголок Молдо көчөсүнөн Курманжан даткага чейинки бөлүгүндөгү иштерди аяктоо 10-15-октябрга чейин пландалып, мөөнөт проспектинин узундугун жана туурасын, ошондой эле аба ырайынын шарттарын эске алуу менен белгиленген.
Ошондой эле бүгүн, 16-июлда биринчи этап менен Юнусалиев көчөсү Сухэ Батор көчөсүнөн Сүйөркуловго чейин жабылды.
Капиталдык оңдоо иштери Сухэ Батор көчөсүнөн Горький көчөсүнө чейин пландалууда.
Ошондой эле Манас проспектисинен 7-апрелге чейин Горький көчөсүн бойлой капиталдык оңдоо иштери пландалууда.
"Курулуш мезгилин рационалдуу пайдалануу максатында көчөлөрдүн айрым участоктору бекитилген графиктен алда канча эрте жабылган. Ремонт иштери графиктен 18-20 күн алдыда жүрүп жатат.
Белгилей кетсек, иштин жүрүшүн такай көзөмөлдөө максатында жумуш жүрүп жаткан көчөлөргө онлайн камералар орнотулган", - деп билдиришти мэриядан.