"Чарчады ал". Мунарбек Сейитбек уулуна секундант болгон өзбек машыктыруучусунун видеосу тарады

Париж шаарында өтүп жаткан Жайкы Олимпиада оюндарынын жарым финалына чыккан Мунарбек Сейитбек уулуна секундант болгон өзбекстандык машыктыруучунун видеосу тарады.

Өзбекстандык машыктыруучу Акмал Хасанов Мунарбек Сейитбек уулу чейрек финалда америкалык Жамал Харви менен беттешип жатканда рингге чейин кирип келип, секундант болгон. Ошондой эле ал ошол учурда Кыргыз Республикасы деген жазуусу бар футболка кийип алган.

"Колуңду көтөр, макулбу? Ал чарчады", - деген өзбек машыктыруучусу Мунарбекке.

Бул видеодон кийин көпчүлүк кыргызстандыктар өзбекстандык машыктыруучуга ыраазычылык билдиришүүдө. Айрымдары бул машыктыруучу кыргыз-өзбек достугун дагы жакындатканын жазышты.

Мунарбек Сейитбек уулу кечээ, 4-августка караган түнү америкалык атаандашын жеңип, Олимпиаданын жарым финалына жолдомо алды. Бул жок эле дегенде коло байге бар дегенди билдирет.

Жарым финалда Мунарбек Сейитбек уулу болгариялык Хавьер Ибаньес аттуу мушкер менен кез келет. Бул беттеш 9-августка караган түнү өтөт.