Олимпиадада Мунарбекке секундант болгон өзбек машыктыруучусу сыйланды (видео)

Өзбекстандык машыктыруучу Акмал Хасановго "Чыңгыз Айтматов" атындагы медаль ыйгарылды. Бул тууралуу "Ысык-Көл форуму” эл аралык коомдук бирикмесинин башкы катчысы Ассоль Молдокматова билдирди.

Анын айтымында, улуу жазуучунун уулу, экс-тышкы иштер министри Аскар Айтматов менен болгон сүйлөшүүдө өзбекстандык машыктыруучу Акмал Хасановго адамгерчилиги үчүн "Чыңгыз Айтматов" атындагы медалды тапшыруу чечими кабыл алынган.

"Бүгүн урмат-сый иретинде өзбек чепкенин кийип, Париждеги өзбекстандык машыктыруучу Акмал Хасановго телефон чалып, залкар жазуучу "Чыңгыз Айтматовдун" медалы менен сыйланганын айтып, ыраазычылыгын билдирип, кубандырдым. Бүгүн Өзбекстандын мушкерлеринде мелдештер болуп, Акмал байланышка чыкты. Акмал - адамгерчилик, бир туугандык мамилеңиз үчүн рахмат! Баалайбыз, сыйлайбыз, суктанабыз! Сизди күтөбүз! Сиз бардык мактоолорго жана сыйлыктарга татыктуусуз!", - деген Ассоль Молдокматова.

Буга чейин Париж шаарында өтүп жаткан жайкы Олимпиада оюндарынын жарым финалына чыккан Мунарбек Сейитбек уулуна секундант болгон өзбекстандык машыктыруучунун видеосу тараган.

Бул видеодон кийин көпчүлүк кыргызстандыктар өзбекстандык машыктыруучуга ыраазычылык билдиришүүдө. Айрымдары бул машыктыруучу кыргыз-өзбек достугун дагы жакындатканын жазышкан.