Сот Камчы Көлбаевдин апасын 7 жылга эркинен ажыратып, бир жылдык шарттуу жаза берди

Бүгүн, 8-августта Бишкектин Октябрь райондук соту кримтөбөл Камчы Көлбаевдин апасы Мая Алиевага карата өкүм чыгарды. Бул тууралуу маалыматты шаардык соттун басма сөз кызматы тастыктады.

Маалыматка ылайык, райондук сот аны Кылмыш-жаза кодексинин "Кылмыштуу жол менен алынган кирешелерди мыйзамдаштыруу" беренеси боюнча күнөөлүү деп таап, 7 жылга эркинен ажыратып, бир жылдык шарттуу түрдө жаза чегерди. Ошондой эле мүлкүн конфискациялоо чечимин чыгарган.

Алиеванын адвокаты Бактыбек Жумашев Мая Алиева Пробация департаментине каттоого турушу керектигин, түрмөгө камалбай турганын айтты. Ошондой эле бул өкүмгө каршы шаардык сотко арызданарын кошумчалады.

Буга чейин маркум кримтөбөл Көлбаевдин туугандары президент Садыр Жапаров менен УКМК төрагасы Камчыбек Ташиевге кайрылышып, апасына козголгон кылмыш ишин адилеттүү карап берүүнү өтүнүшкөн.