Жоламан Шаршенбеков кыргызстандыктарга ыраазычылык билдирди

Балбан Жоламан Шаршенбеков Парижде өткөн Жайкы Олимпиада оюндарынан кийин билдирүү жасады. Ал кыргызстандыктарга Олимпиадада көрсөткөн колдоосу үчүн ыраазычылык билдирди.

"Мага болгон ишенимиңиздердин жана колдооңуздардын жардамы менен коло медалга ээ болдум. Бул жетишкендик мага гана эмес, менин сапарымдын ар бир этабында колдоп, жанымда жүргөндөргө таандык. Агайларга, дарыгерлерге, массажчыларга, мамлекеттке, күрөш федерациясына жана спортчуларды Олимпиадага даярдоого катышкан бардык адамдарга чоң рахмат! Менин ийгилигиме кошкон колдооңуздар жана салымыңыздар үчүн дагы бир жолу ыраазычылык билдирем! Бул медаль биздин жалпы жеңишибиз, мен аны сүйүктүү мекенимдин ар бир жаранына арнайм!", - деп жазды Шаршенбеков социалдык тармактагы баракчасына.

Белгилей кетсек, Олимп оюндарында коло байге үчүн беттеште Жоламан Шаршенбеков азиялык атаандашы болгон ирандык Мехди Мохсен Нежад менен кез келип, атаандашын 3:1 эсебинде жеңип алды. Муну менен Шаршенбеков карьерасында биринчи жолу Олимпиада медалын утту.

Автор: Бек Оморбеков