Кыргыз спортчуларына диетолог менен психологдун эмне себептен жок экени айтылды

Дене тарбия жана спорт департаментинин жетекчиси Айбек Абдымомунов маалымат жыйында кыргыз спортчуларына диетолог менен психологдун кажети жок экенин айтты.

Анын билдиришинче, диетолог менен психологдор спортчуларды мелдештерде дайыма коштоп жүрө алышпайт.

"Машыктыруучулар спортчуларды ийне-жибине чейин билишет. Спортчулар окуу-машыгууларда айлап-айлап жүрүшөт, мелдештерге барышат. Андыктан диетолог менен психологдор аларды дайыма коштоп жүрө алышпайт. Машыктыруучулардын өздөрүнүн программалары бар, 4 жылга ылайыктап программа түзүшөт. Буга байланыштуу диетолог менен психологдордун кажети жок", - деди Абдымомунов.

Буга чейин коомчулукта Париж Олимпиадасына барган кыргыз спортчуларына түзүлгөн шарт, күрөш боюнча курама командада диетолог, психолог жоктугу тууралуу маселе көтөрүлгөн.