Стамбулдагы тайбокс боюнча мелдеште Кыргызстан курамасы 5 медаль утту

Кыргызстандын тайбокс боюнча улуттук курама командасынын мүчөлөрү Түркиянын Стамбул шаарында өткөн Дүйнө чемпиондугунда 2 алтын, 1 күмүш, 2 коло медаль жеңишти. Бул туурасында бүгүн, 19-августта Дене тарбия жана спорт департаментинен билдиришти.

Маалымдалгандай, кыз-келиндер арасындагы мелдеште, 60 килограммга чейинки салмакта Аделя Асылбек кызы жана 51 килограммдык салмак ченинде Милана Шихшабекова алтын медаль алды.

Ал эми Орозбекова Махабат 67 килограммга чейинки салмакта 2-орунду ээлесе, Шарипа Мунарбек кызы 45 килограммга чейинки салмак категориясында коло медалга ээ болду.

Ошондой эле эркектер арасында Ихтияр Каныметов 63,5 килограммга чейинки салмакта спортчулар менен күч сынашып, 3-орунду ээлеген.

Мелдеш 14-18-август күндөрү өтүп, курама команда башкы машыктыруучу Дильшат Даутовдун жетекчилиги алдында мелдешке катышты.

Автор: Замира Ниязбекова