Жөө күлүк Трофимовага унаа жана акчалай сыйлык тапшырылды

Бүгүн, 20-августта маданият, маалымат, спорт жана жаштар саясаты министри Алтынбек Максүтов Париж Олимп оюндарынын катышуучусу Сардана Трофимовага 500 миң сомдук сертификат жана Chevrolet Tracker үлгүсүндөгү унааны тапшырды. Бул тууралуу министрликтен кабарлады.

Ага ылайык, Сардана Трофимова колдоо көрсөткөн өлкө жетекчилигине жана министрге ыраазычылык билдирип, алынган белектер мындан ары дагы бийктиктерди багындырууга шык берерин айтты.

Мындан тышкары иш-чарага катышкан өлкөнүн жеңил атлетика федерациясынын президенти Канат Аманкулов өлкө жетекчилигинин көрсөткөн колдоосуна ыраазычылык билдирип, азыркы учурда мамлекетте спортту өнүктүрүүгө бардык шарттар түзүлгөнүн айтты.

Билгелей кетсек, 13-август күнү Париж Олимп оюндарынын катышуучуларын жана байге ээлерин сыйлоо аземи болуп өткөн. Сардана Трофимова иш-чарага жүйөлүү себептер менен катыша албай калгандыгына байланыштуу сыйлыктар бүгүн тапшырылды.

Ал Олимпиадада жеңил атлетика боюнча марафондо 91 мамлекеттин ичинен 14-болуп келген.

Автор: Каныкей Амантаева
Фото: Маданият, маалымат, спорт жана жаштар саясаты министрлиги