Кыргыз футболчусу чет элден келген футболчу менен жаңжалдашып, жаагын сындырып салды

Кыргыз футболчусу Мирбек Ахматалиев өзүнүн командалашы, чет элдик футболчу Евгений Терси менен жаңжалдаша кетип, анын жаагын сындырып салды. Бул тууралуу Кыргыз футбол биримдиги кабарлады.

Окуя 15-август күнү Бишкектеги "Сельмаш" стадионунда болгон. Анда машыгуу учурунда Мирбек Ахматалиев менен легионер футболчу жаңжалдаша кетип, анын кесепетинен чет элдик футболчунун жаагы сынган.

Мындан улам "Мурас Юнайтед" клубу Кыргыз футбол биримдигине кат жолдогон. Ал катты Дисциплинардык комитет карап, Мирбек Ахматалиевди футболго тиешелүү бардык ишмердүүлүктөн 5 жылга четтеткен.

Өз кезегинде Кыргыз футбол биримдиги футболдо агрессия жок экенин белгилеп, бул окуяны кескин айыптады.

Автор: Азат Бейшенбеков