Мектептерде мыйзамсыз акча чогултууларга тыюу салуу мыйзамын комитет жактырды

Бүгүн, 10-сентябрда Жогорку Кеңештин Укук тартиби, кылмыштуулук менен күрөшүү жана коррупцияга каршы аракеттенүү боюнча комитетинин отурумунда мектептерде мыйзамсыз акча чогултууларга жана коомдук фонддорду түзүүгө тыюу салган мыйзам долбоору биринчи окууда каралып, жактырылды.

Демилгечи депутат Миргүл Темирбаева белгилегендей, президенттин жарлыгына карабай азыркы учурда мектептерде акча чогултуу улантылып жатат. Мындан улам мыйзам долбоору мектепте акысыз билим алуу укугун камсыз кылууга, мыйзамсыз акча чогултууларды, анын ичинде мектептерде коомдук фонддорду түзүүнү болтурбоо максатында жоопкерчилиги күчөтүлүп иштелип чыкты.

Мыйзамсыз акча чогултуу фактылары аныкталса, Укук бузуулар жөнүндө кодексине ылайык жоопкерчиликке тартуу сунушталууда.

Талкуу учурунда депутат Русланбек Жакышев мыйзам долбооруна өз ыктыяры менен акча чогултууга аралашкан ата-энелер комитетинин да жоопкерчилигин кароо сунушун берди.

Автор: Бек Оморбеков