Көчмөндөр оюндары: Жер улактын финалы чыр менен өттү (видео)

Бүгүн, 12-сентябрда Астана шаарында өтүп жаткан V Дүйнөлүк көчмөндөр оюндарынын алкагында жер улактын финалдык беттеши орун алды. Анда Казакстан курамасы 5:4 эсебинде кыргыз улакчыларын жеңип алды.

Бирок алтын байге үчүн беттеш чыр менен коштолду. Алсак, оюндун биринчи бөлүгүнүн 13-мүнөтүндө кыргыз курамасы эсепти 3:1 кылып, алдыга чыккан болчу. Бул учурда казак оюнчусу Улан Байтөреев салым салган Кубанычбек Султан уулун камчы менен чаап жиберди. Мындан улам ортодо пикир келишпестик жаралып, биринчи тайм бүтөрүнө 6 мүнөт калганда оюн токтотулуп, 15 мүнөттөй үзгүлтүккө учурады.

Оюндун экинчи бөлүгүндө эсеп саны 4:4кө теңелип, жер улактын эрежеси боюнча кошумча 10 мүнөт убакыт берилди. Кошумча убакытта казак улакчысы калыстын ышкырыгы жаңырганга чейин эле эңкейип улакты алып кетти, калыс да оюнду токтоткон жок. Жыйынтыгында Казакстандын командасы биринчи болуп "алтын салымды" салып кетти.

Негизинен оюндун жүрүшүндө мындай адилетсиздиктер көп эле орун алды. Буга нааразы болгон социалдык тармактын колдонуучулары дагы оюн калыс өтпөгөнүн жазып жатышат.

Көк бөрү жана жер улак боюнча эксперт Рамис Кудайбергенов кыргыз спортчулары бул оюнда өздөрүнүн мыктылыгын, күчтүүлүгүн көрсөткөнүн айтып, оюндун жүрүшүн "адилетсиз" деп атады.