Өлкө башчы Кыргыз Республикасынын Баатыры Апас Жумагулов менен жолукту

Бүгүн, 19-сентябрда өлкө башчы Садыр Жапаров Кыргыз Республикасынын Баатыры Апас Жумагулов жана анын жубайы менен “Ынтымак Ордо” имаратында жолугушту. Бул тууралуу президенттин маалымат кызматынан билдиришти.

Маалымдалгандай, мамлекет башчысы Апас Жумагуловдун Кыргызстандын өнүгүшүнө кошкон зор салымын, ал өкмөттү жетектеп турганда, өлкө татаал кырдаалга туш болгондо, саясий жана экономикалык кризистен чыгуунун жолун тапканын белгиледи. Садыр Жапаров Апас Жумагуловдун жетекчилиги астында өлкө туруктуу өнүгүү жолуна түшкөнүн айтып өттү.

Ошондой эле ал Апас Жумагулов сыяктуу көрүнүктүү инсандардын жана мамлекеттик ишмерлердин портреттери мамлекеттик мекемелердин дубалдарында илинип турушу керектигин баса белгиледи.

"Мындан тышкары Садыр Жапаров Кыргызстандын экономикалык, социалдык жана маданий жактан калыптанышына зор салым кошкон Апас Жумагуловдун 90 жылдыгын белгилөө максатында Жумагуловдун параддык портретин “Ынтымак Ордо” имаратынын коридоруна орнотуу үчүн Президенттин иш башкармалыгына президенттик фонддон каражат бөлүнөрүн белгиледи", - деп айтылат маалыматта.

Өз кезегинде Апас Жумагулов ыраазычылыгын айтып, мындан ары да өлкөнүн бакубаттуулугун жана гүлдөп өнүгүшүн чыңдоого активдүү көмөктөшүүгө даяр экендигин билдирди.

Президент Садыр Жапаров Апас Жумагуловго эстеликке белектерин тапшырып, ыраазычылыгын билдирди.