Кытайдын Сиань шаарында (Шэньси провинциясы) Кыргыз-кытай соода-экономикалык кызматташтык борбору ачылды. Бул тууралуу Министрлер кабинетинен билдирди.
Маалыматка ылайык, ачылыш аземи суу ресурстары, министрлер кабинетинин төрагасынын орун басары Бакыт Төрөбаев жана Шэньси провинциясынын губернатору Чжао Ган баштаган эки тараптын мамлекеттик органдарынын жетекчилеринин катышуусунда өттү.
Борбордун жалпы аянты 1000 чарчы метр. Анда Кыргызстанда өндүрүлгөн продукцияларды көргөзмөгө коюуга жана Кыргызстан тууралуу маалымат алууга, ошондой эле ишкерлер ортосунда эки тараптуу жолугушууларды өткөрүүгө болот, бул үчүн бардык шарттар түзүлгөн.
Ошондой эле Сиань шаарынын так ортосунда 200 чарчы метрди ээлеген Кыргызстандын соода күркөсүнүн ачылыш аземи болду. Бул күркөдө Кыргызстанда чыгарылган продукциялар үзгүлтүксүз сатыкка коюлуп турат. Ата-мекендик продукциялар офлайн форматында гана эмес, Douying, Wechat жана Pingduoduo сыяктуу интернет-тиркемелери аркылуу да онлайн сатыкка чыгат.
Бул жалпы 1200 чарчы метр аянт Сиань шаарынын мэриясы тарабынан Кыргызстанга 3 жылга акысыз берилди.
Андан соң эки тараптын делегация башчыларынын катышуусунда Кыргызстан менен Кытайдын Шэньси провинциясынын алдыңкы компанияларынын бизнес-форуму болуп өттү, ага эки тараптан 200дөн ашык компаниянын өкүлдөрү катышты.
Бизнес-форумдун жүрүшүндө Кыргызстандын жана Кытайдын экономика жана коммерция, инвестиция, туризм тармактарындагы мамлекеттик органдарынын жетекчилери, ошондой эле ишкерлер өнөр жай, туризм, транспорт, айыл чарба сыяктуу тармактарда инвестициялык мүмкүнчүлүктөр тууралуу баяндама жасап, долбоорлорду сунушташты.
Форумдун жыйынтыгында Кыргызстандын жана Кытайдын мамлекеттик органдарынын жана ишкерлеринин ортосунда бир катар инвестициялык макулдашууларга кол коюлду.
Мындан сырткары Төрөбаевдин Кыргызстанда ишмердүүлүк жүргүзгөн “Shaanxi Coal and Chemical Industry Group Co., Ltd” компаниясынын жетекчиси Чжан Вэньци менен жолугушуусу болду. Анда тараптар тоо-кен тармагындагы кызматташуунун актуалдуу маселелерин сүйлөшүп, Кыргызстанда кайра иштетүү өнөр жайы чөйрөсүндө кызматташуу сунушталды.
