"Кыргызстан инвестиция үчүн ачык". Акылбек Жапаров JICAнын вице-президенти менен жолукту

Бүгүн, 26-сентябрда министрлер кабинетинин төрагасы Акылбек Жапаров Япониянын эл аралык кызматташтык агенттигинин (JICA) вице-президенти Сачико Имото менен жолугушту. Бул туурасында президенттик администрациянын маалымат кызматы билдирди.

Акылбек Жапаров өкмөт өлкөнүн социалдык-экономикалык өнүгүүсүн тездетүү боюнча аракеттерди көрүп жатканын белгилеп, чийки зат экспортунун моделинен индустриалдык-инновациялык моделге өтүүгө басым жасап жатканын белгиледи. Анын айтымында, акыркы үч жылда экономиканын өсүшү орто эсеп менен 7%га жакын, ал эми мамлекеттик консолидацияланган бюджет эки эседен ашык өстү.

Ошондой эле ал Кыргызстан менен Япониянын долбоорлорду ишке ашыруудагы биргелешкен аракеттери экономиканын өсүшүнө гана эмес, жарандардын жашоо сапатын жогорулатууга да салым кошоруна ишенимин билдирди.

«Биз өлкөбүздүн туруктуу өнүгүүсүнө жана гүлдөп-өсүшүнө жетишүүгө жардам бере турган жаңы идеяларга жана чечимдерге ачыкпыз», - деп сөзүн жыйынтыктады Акылбек Жапаров.