Зеленский президенттик шайлоого даярданууда

Украинанын президенти Владимир Зеленский бийликтеги позициясын бекемдөөнү каалайт жана бул үчүн ал 2025-жылы президенттик шайлоо өткөрүшү мүмкүн. Бул тууралуу The Economist журналы өздүк булактарына таянуу менен жазып чыкты.

Басылма ошондой эле Украинанын Улуттук демократиялык институтунун маалыматтарына шилтеме жасап, Зеленскийдин рейтинги 2023-жылдын майындагы 80 пайыздан быйыл 45 пайызга түшкөнүн белгилейт. Башында жүрүп жаткан согушка байланыштуу бардык негизги саясий партиялар шайлоону тынчтык орногонго чейин жылдырууга макул болушкан. Бирок айрым маалыматтарга караганда, Зеленский азыр өз бийлигин бекемдөө үчүн мөөнөтүнөн мурда шайлоо өткөрүү мүмкүнчүлүгүн карап жатат.

Украин оппозициясынын лидерлеринин бири Юлия Тимошенко өлкөдө шайлоого саясий даярдыктар жүрүп жатканын басылмага ырастады. Зеленскийдин кеңсеси бул маалымат боюнча комментарий бере элек.

Зеленскийдин президенттик мөөнөтү расмий түрдө ушул жылдын май айында аяктаган. Бирок өлкөдө жарыяланган аскердик абалдын фонунда президент согуштук аракеттер аяктаганга чейин шайлоо дайындоону токтото турууну чечкен.

Бардык талкууларга карабастан май айындагы сурамжылоолор көрсөткөндөй, украиналыктардын үчтөн экисинен көбү шайлоо согуш аяктагандан кийин гана өткөрүлүшү керек деп эсептейт.

Автор: Бек Оморбеков