Муратбек Азымбакиев БУУнун Башкы Ассамблеясынын 79-сессиясында бир катар жолугушууларды өткөрдү

Президенттик администрациянын тышкы саясат бөлүмүнүн башчысы Муратбек Азымбакиев БУУнун жана чет мамлекеттердин жогорку даражалуу өкүлдөрү менен бир катар жолугушууларды өткөрдү жана жасалма интеллекттин потенциалын өнүктүрүү жаатында эл аралык кызматташуу боюнча жогорку деңгээлдеги отурумга катышты.

Президенттин басма сөз кызматынан билдиргендей, жолугушуулар Нью-Йоркто БУУнун Башкы Ассамблеясынын 79-сессиясынын алкагында уюштурулду. Иш-чаралардын алкагында Азымбакиев БУУнун башкы катчысынын орун басары, терроризмге каршы башкармалыктын башчысы Владимир Воронков менен жолугушту.

Жолугушууда Кыргызстан менен БУУнун ортосундагы терроризм жана зордук-зомбулук экстремизмге каршы күрөштө өнөктөштүктү бекемдөө маселелери талкууланды. Ошондой эле эл аралык коопсуздуктун негизги маселелери жана террористтик коркунучтарга биргелешип каршы туруу боюнча пикир алмашуу болду.

Мындан тышкары ал Лаостун премьер-министринин орун басары жана тышкы иштер министри Салеумхай Коммасит жана Тувалунун юстиция, коммуникация жана тышкы иштер министри Паулсон Панапа менен жолугушту. Аларга 2027-2028-жылдарга БУУнун Коопсуздук Кеңешинин туруктуу эмес мүчөлүгүнө Кыргызстандын талапкерлигин колдоо боюнча өтүнүч-кат тапшырды.

Муратбек Азымбакиев дипломаттар менен болгон жолугушуулардан тышкары Кытай жана Замбия тарабынан уюштурулган жасалма интеллектти өнүктүрүү боюнча эл аралык кызматташтык боюнча жогорку деңгээлдеги отурумга катышты. БУУнун Башкы Ассамблеясынын 79-сессиясында өткөн бул отурум технологияларды өнүктүрүү жана аларды Глобалдык Түштүк өлкөлөрүнүн, анын ичинде Кыргызстандын кызыкчылыктарында колдонуу перспективаларын талкуулоо үчүн маанилүү аянтча болуп калды.

Автор: Бек Оморбеков