Зеленский Трамп анын “жеңиш планын” жактырганын айтты

Дональд Трамп АКШдагы президенттик шайлоодо жеңип чыкса, Украинаны колдоого убада кылды. Бул тууралуу Украинанын президенти Владимир Зеленский Нью-Йоркто экс-президент менен жакында болгон жеке жолугушуусунда сөз болгонун билдирди.

"Дональд Трамп түздөн-түз биз тарапта болорун, Украинаны колдой турганын ачык айтты", - деди Зеленский америкалык Fox News каналына берген маегинде.

Украин президенти ошондой эле Трамп менен өзүнүн “жеңиш планын” бөлүшкөнүн жана экс-президент ага абдан кызыкдар экенин айтты. Мындан тышкары Зеленскийдин айтымында, Трамп согуштун жүрүшү, анын себептери жана Украинанын коргонууга болгон учурдагы муктаждыктары тууралуу көп сураган.

Зеленскийдин планынын негизги пункту – Вашингтондун америкалык куралды украин аскерлерине эч кандай чектөөсүз колдонууга уруксат берүүсү, ошондой эле аскердик жардамдын көлөмүн көбөйтүүсү.

Автор: Бек Оморбеков