Ватиканда Садыр Жапаров Рим папасы Франциск менен жолугушту

Бүгүн, 4-октябрда Ыйык Тактыга (Ватикан) жасаган расмий сапардын алкагында президент Садыр Жапаров жана биринчи айым Айгүл Жапарова Рим папасы Франциск менен жолугушту.

Садыр Жапаров Кыргызстан ондогон этникалык топтордун өкүлдөрү тынчтыкта жана ынтымакта жашаган светтик көп улуттуу мамлекет экенин баса белгиледи. Жана да мамлекет дин тутуу эркиндигин кепилдеп, жарандардын сыйынуусуна кийлигишпей тургандыгын билдирген.

Франциск да Кыргызстандын көп улуттуу жана көп конфессиялуу коомду колдоо аракетин жогору баалап, бул баалуулуктарды сактоо боюнча иштерди улантуунун маанилүүлүгүн белгиледи.

Баарлашуунун аягында Садыр Жапаров Рим папасын анын өзүнө ыңгайлуу учурда Кыргызстанга келип кетүүгө чакырды.

Автор: Замира Ниязбекова