Папан суу сактагычына чакан ГЭС курула баштады

Министрлер кабинетинин төрагасы Акылбек Жапаров Ош облусуна жасаган иш сапарынын алкагында Папан чакан ГЭСинин курулушуна капсула салуу аземине катышты. Бул тууралуу бүгүн, 5-октябрда Министрлер кабинетинен билдиришти.

Анда Акылбек Жапаров акыркы жылдары мамлекет электр энергиясын өндүрүү маселесине катуу көңүл буруп жаткандыгын белгилеп өттү.

"Быйыл Бала-Саруу Көгарт, Кайнама ГЭСтери ишке берилди. Ал эми Папан суу сактагычына курулуучу чакан ГЭСтин кубаттуулугу 25 мегаватт, жылына орточо 103 миллион киловатт саат электроэнергияны өндүрөт. Инвестициянын суммасы 27 миллион доллар.

Папан суу сактагычына чакан ГЭСти куруу өлкөбүздү энергетикалык көз карандылыктан куткарууга багытталган стратегиялык дагы бир кадам"-деп сөзүн жыйынтыктадыАкылбек Жапаров.

Маалымат үчүн: Чакан ГЭС курулуп жаткан Папан ирригациялык суу сактагычы, Катар массивинин жанындагы Ак-Буура дарыясынын өрөөнүндө, Папан капчыгайынын эң кууш жеринде жайгашкан. Папан суу сактагычынын курулушу 1979-жылы башталып, 1985-жылы ишке киргизилген.