Нарында "Ала-Тоо" мейманканасынын аймагы мамлекетке кайтарылды (видео)

Нарын шаарындагы "Ала-Тоо" мейманканасынын аймагы мамлекетке кайтарылды. Бул тууралуу бүгүн, 5-октябрда Улуттук коопсуздук мамлекеттик комитети билдирди.

Атайын кызмат тарабынан Нарын шаарынын борборундагы 0,32 гектар аянттагы "жалпы пайдалануудагы жерлер" категориясына кирген, Нарын шаарындагы "Ала-Тоо" мейманканасынын администрациясы жанаша жайгашкан аймак катары пайдаланып келген жер участогу мамлекеттин балансына кайтарылды.

2007-жылы Нарын облустук сотунун коллегиясы тарабынан тийиштүү ыйгарым укуктары жоктугуна карабастан, прокуратура органдарынын жана жергиликтүү өз алдынча башкаруу органдарынын нааразылыктарын эске албай, жер мыйзамдарынын талаптарын бузуу менен М.А. аттуу жаранына аталган жер участогуна ээлик кылуу укугун өткөрүп берүү жөнүндө чечим чыгарылгандыгы аныкталган.

Тергөөгө чейинки текшерүүнүн алкагында "Жер кодексинин" 78-беренесин бузуу фактылары аныкталган. Аталган участоктун наркы 97 миллион сомго бааланган.

Керектүү юридикалык процедуралардан кийин аталган участок мыйзамда белгиленген тартипте Нарын шаарынын мэриясынын балансына өткөрүп берилген.