Армения Азербайжан менен тынчтык келишимине кол коюуга даяр экенин билдирди

Армения Азербайжан менен октябрь айында тынчтык келишимине кол коюуга даяр. Бул тууралуу премьер-министр Никол Пашинян Москвада өткөн КМШ өлкөлөрүнүн саммитинде билдирди.

Пашинян келишимдин долбоорунда өлкөлөр ортосундагы тынчтыктын бекем пайдубалына айлана турган принципиалдуу маселелерге токтолду. Алардын ичинде Армения менен Азербайжандын аймактык бүтүндүгүн өз ара таануу жана аймактык дооматтардын жоктугун ырастоо, аларды келечекте жасабоо убадасы да бар.

Мындан тышкары тараптар күч колдонбоо жана коркутпоого, бири-биринин ички иштерине кийлигишпөө жана дипломатиялык мамилелерди орнотуу жөнүндө макулдашууга тийиш.

"Биз бул документке ушул айда кол коюуга даярбыз жана бул биздин расмий позициябыз", - деди Пашинян.

Анын айтымында, келишим долбоору 80 пайызга кем эмес макулдашылган, ал эми жакында эки өлкөнүн тышкы иштер министрлери бул багыттагы ишти активдештирүү боюнча макулдашышты.