Депутаттар аларды тоготпогон өкмөт мүчөлөрүнө чара көрүүнү талап кылышты

Бүгүн, 9-октябрдагы Жогорку Кеңештин жыйынында депутаттар Министрлер кабинетинин мүчөлөрү аларды тоготпой жатканын айтып, нааразы болушту.

Депутат Марат Мураталиев Мамкурулуштун жетекчисинин орун басары өз укугунан аша чаап, анын ишине кийлигишкенин билдирди.

Аны эл өкүлдөрү Дастан Жумабеков менен Эрулан Кокулов кубаттап, өкмөт мүчөлөрү өз милдеттерин так аткарбай жатканын айтып, аткаминердин бул жоругун мыйзам бузуу катары кароого болорун белгиледи.

Төрага Нурланбек Шакиев дагы минкаб башчысынын төрагасынын орун басары Бакыт Төрөбаевге кайрылып, айрым минкаб мүчөлөрү Жогорку Кеңеш менен Министрлер кабинетинин ортосуна жик салып жатканын айтты.

"Айрым бейтартип адистердин айынан Жогорку Кеңеш менен Министрлер кабинетинин ортосунда жарака кетип, жагымсыз жагдайлар түзүлгөн учурлар жок эмес. Ишине жоопкерчиликсиз мамиле кылып, өз милдеттерин билбеген ошондой кызматкерлерге Министрлер кабинетинин жетекчилери сөзсүз чара көрүшү керек. Эгер чара колдонулбаса, Жогорку Кеңеш тиешелүү иштерди алып барууга укуктуу”, – деди ал.

Жыйынтыгында Төрөбаев Таластагы окуя боюнча кызматтык иликтөө жүрө турганын билдирди.

Автор: Бек Оморбеков