Акылбек Жапаров Мюнхендеги форумда ишкерлерди Кыргызстанга инвестиция салууга чакырды

Бүгүн, 10-октябрда Министрлер кабинетинин төрагасы Акылбек Жапаровдун Мюнхенге болгон жумуш сапарынын алкагында кыргыз-герман бизнес-форумунда сөз сүйлөдү. Бул туурасында өкмөттүн маалымат кызматы кабарлады.

Анда төрага Гамбургда өткөн биринчи бизнес-форумдан бери Кыргызстан менен Германиянын мамилеси чыңдалып, кызматташууну тереңдетүүгө эки тараптын кызыкчылыгы пайда болгондугун айтты. Ошондой эле өлкөнүн экономикасын көтөрүү жана ири инфраструктуралык долбоорлорду ишке ашыруу үчүн Кыргызстанга инвестиция керек экенин белгиледи.

“Биздин президент бир нече жыл мурда инвесторлорго таптакыр жаңы мамилени түзүүнү жарыялаган. Биз талаштуу жагдайларда, биринчи кезекте, тескерисинче, далилденгенге чейин “Инвестор ар дайым туура” деген түшүнүктү карманабыз”, – деп белгиледи төрага.

Ал ошондой эле жаңы инвестициялык саясатты колдоо максатында инвесторлордун ишенимин жогорулатууга, жагымдуу инвестициялык климатты жана бизнес чөйрөсүн түзүүгө, анын ичинде менчикти коргоого багытталган ченемдик-укуктук актылардын комплекси кабыл алынганын кошумчалады.

“Инвесторлор өлкө жетекчилигине жана Министрлер кабинетине 24 саат бою күнү-түнү эркин кирип чыга алат”, – деди Акылбек Жапаров.

Сөзүнүн аягында Акылбек Жапаров германиялык ишкерлерди Кыргызстанга келип кетүүгө чакырды.

Автор: Замира Ниязбекова