Казакстандын шаарына өспүрүмдүн резонанстуу өлүмүнөн кийин Улуттук гвардия кирди

Коңшу Казакстандын Талгар шаарына 16 жаштагы өспүрүмдүн өлүмүнөн кийин коомдук тартипти сактоо боюнча патрулдук кызматты аткаруу үчүн өлкөнүн Ички иштер министрлигинин Улуттук гвардиясынын өздүк курамы алынып келинди. Бул тууралуу Tengrinews порталы 14-октябрда ведомствонун басма сөз кызматына шилтеме берүү менен билдирди.

"Учурда Алматы облусунун Талгар шаарына Казакстан Республикасынын Ички иштер министрлигинин Улуттук гвардиясынын аскер бөлүгүнөн өздүк курам патрулдук кызматты аткаруу үчүн тартылды", - деп билдирген казак министрлиги.

Талгар – Казакстандын түштүгүндө жайгашкан Алматынын чет жакасындагы шаар.

Кеп 4-октябрда болгон адам өлтүрүү тууралуу болуп жатат. Ошол күнү жергиликтүү дүкөнгө агрессивдүү кардар келип, аны менен кызматкерлер жаңжалдаша кетишкен. Ал учурда дүкөнгө атасын көргөнү келген 16 жаштагы өспүрүм дагы болгон. Чырга өспүрүм дагы аралашкан.

Жаңжалдан кийин кардар болуп келген жаран досторуна телефон чалып, окуя болгон жерге анын достору келип, тапанча жана бычак менен балага, анын атасына жана агасына кол салышкан. Өспүрүм каза болгон.

12-октябрга караган түнү өспүрүмдүн үйүнөн өрт чыгып, имарат толугу менен күйүп кеткен. Буга байланыштуу полиция кызматкерлери күнү-түнү нөөмөт уюштуруп, баланын үй-бүлөсү коопсуздук менен камсыз болгон.

Алматы облусунун прокуратурасы кылмышка шектелип жети адам кармалганын билдирди.

Автор: Азат Бейшенбеков