Тышкы иштер министрлигиндеги бардык желектер түшүрүлдү. Себеби

Бүгүн, 14-октябрда Бишкекте Тышкы иштер министрлигинин имаратында мекеме жаңы дарекке көчкөнүнө байланыштуу расмий желек түшүрүү аземи болуп өттү. Бул тууралуу ТИМдин басма сөз кызматынан кабарлады.

Маалымдалгандай, саамалыкка тышкы иштер министри Жээнбек Кулубаев, министрдин орун басарлары жана министрликтин бардык түзүмдүк бөлүмдөрүнүн башчылары катышты.

Кулубаев министрлик мурдагы даректеги ишин аяктап, ведомствонун тарыхындагы жаңы барагын ачып жатканын белгилеп, кызматкерлерди жаңы имаратта эл аралык кызматташтыкты жана өлкөнүн дипломатиялык ишмердүүлүгүн жаңы деңгээлге көтөрүү максатында чын ыклас жана жаңы дем менен иштөөгө чакырды.

Министрликтин желектери ТИМдин жаңы Абдумомунов көчөсү, 207 дарегиндеги (мурдагы өкмөт үйү) имаратында көтөрүлдү.

Автор: Бек Оморбеков