Нигерия улуттук курамасы кароосуз аэропортто ачка калып, футбол ойноодон баш тартты

Футбол боюнча Нигерия улуттук курама командасы Ливияга каршы ойноо үчүн бул өлкөгө барып, ачка калышты. Бул тууралуу чет элдик спорттук басылмалар жазышты.

Маалыматка ылайык, Нигерия курамасы Африка Кубогуна тандоо оюндарынын алкагында Ливияга каршы ойноо үчүн аталган өлкөгө учуп барган. Учак борбор шаар Триполиге конушу керек болчу. Бирок белгисиз себептерден улам учак кароосуз калган аэропортко конгон.

Мындан улам футболчулар аталган аэропортто байланышсыз, тамак-ашсыз 13 саат отурушкан. Кабыл алган өлкө транспорт дагы уюштуруп беришкен эмес.

Мындан улам нигериялыктар Ливияны жолугушууну атайылап үзгүлтүккө учураткан деп айыптап, футбол ойноодон баш тартты.

Эң кызыгы, Ливия бул окуя боюнча билдирүү жасап, "урматсыздык марафонун" биринчи Нигерия баштаганын айтып чыгышкан. Алар Нигерияга барганда дагы аэропортто кароосуз калганын айтышкан.

Автор: Азат Бейшенбеков