Казак актёру Мурат Бисенбин ракты жеңүүгө убада берди

"Рэкетир" тасмасындагы Русландын ролу менен таанылган казакстандык актёр Мурат Бисенбин рак оорусун жеңүүгө убада берди. Бул тууралуу ал Динара Сатжандын Ютуб каналына берген маегинде айтты.

Анда актёр ошондой эле диагнозу тууралуу кененирээк айтып берди.

"Менде уйку безинин рагы бар. Бул хирургиялык операциялар өтө сейрек жасалган татаал жер. Ошондуктан иммунитетимди көтөрүшүм керек. Жөн эле шишикти алып салуу мүмкүн эмес. Мен химиотерапиянын төрт курсунан өттүм, бирок сегиз курс керек дешти. Төртүнчүдөн кийин мен жетиштүү деп чечтим, анткени мен ички туюмума ишенем", - деди ал.

Ал ошондой эле ага жабышкан ооруга баш ийүүгө акысы жок экенин айтып, ракты жеңүүгө убада берди.

"Жөн гана жеңиш керек. Мен өзүмө “В” вариантын калтырбайм, бир гана “А” варианты. Ооруну жеңип, кайра кайтып келүү. Эч кандай учурда ооруга баш ийүүнү ойлонбойм, жөн гана иштейм, толук кандуу жашайм”, - деп жыйынтыктады актёр.

Сентябрда актёр Мурат Бисенбин рак илдети менен жабыркап жатканын кесиптеши Саят Исембаев айтып чыккан. Ал ошондой эле актёрго жардам берүү үчүн атайын эсептер ачылганын билдирген.

Автор: Азат Бейшенбеков