Орусияда эки миңден ашык мыйзамсыз жүргөн мигрант чыгарылат

Москвада бир жумага созулган “Нелегал-2024” операциясынын экинчи этабынын жыйынтыгы менен 2 миңден ашуун мигрант Орусиядан чыгарылат. Бул тууралуу орус басылмалары жазышууда.

Иш-чаранын алкагында Орусиянын Ички иштер министрлигинин Москва шаары боюнча башкы башкармалыгынын милиция кызматкерлери тарабынан 13 миңден ашык миграциялык мыйзам бузуу фактылары аныкталган.

"Административдик материалдарды кароонун жыйынтыгы боюнча, сот органдары тарабынан Орусиянын аймагынан 2 миңден ашык чет өлкөлүк жарандарды административдик чечим менен чыгаруу кабыл алынган. Чет элдик жарандарды депортациялоо боюнча 20 токтом кабыл алынып, алардын 12си депортацияланган", - деп билдиришти ИИМдин басма сөз кызматы.

Орусиянын Кылмыш-жаза кодексинин беренелери боюнча мыйзамсыз миграцияны уюштуруу боюнча 420 кылмыш иши козголгон.