Милиция ГУМдагы KFC'ге кирип келип, "бойкот" деп кыйкырган жигиттерди кармады (видео)

Бишкекте алдын ала сүйлөшүлгөн адамдардын тобу тарабынан коомдук тартипти одоно бузган шектүүлөр кармалды. Бул тууралуу Бишкек шаардык ички иштер башкармалыгы кабарлады.

Милициянын маалыматына ылайык, 18-19-октябрь күндөрү Бишкек шаарында жайгашкан соода борборлорунун тамактануучу жайларында, азиат улутундагы белгисиз адамдар, коомдук жайда өзүн алып жүрүү эрежелерин одоно бузушуп, “Бойкот” деген сөздөр жазылган плакаттарды көтөрүп, күзөт кызматкерлеринин талаптарына баш ийбестен, коомдук жайга бүлүк салып, коомчулукка жат көрүнгөн аракеттерин жазашып, интернет тармактарында өздөрүнүн аккаунттарына жарыялашкан.

Аталган факт боюнча кылмыш иши козголуп, тергөө башталган.

Тергөө жана ыкчам-иликтөө аракеттеринин жыйынтыгында, 1995-жылы туулган К.А., 2000-жылы туулган Ж.С., 2000-жылы туулган К.Б., 1998-жылы туулган Т.И., аттуу жарандар кармалып, тергөө кызматына жеткирилген.

Учурда бул факты боюнча тергөө иштери уланууда.