Бишкекте массалык мушташ уюштурган чет өлкөлүк жарандар кармалды

Бишкекте массалык мушташ уюштурган чет өлкөлүк жарандар кармалды. Бул тууралуу бүгүн, 8-ноябрда шаардык милициядан билдирди.

Маалыматка ылайык, 3-ноябрда милицияга чет өлкөлүк жарандар мушташып жаткандыгы тууралуу билдирүү келип түшкөн. Окуя болгон жерге, милиция кызматкерлери дароо барышып, оозеки чыр-чатак учурунда чет элдик жарандардын ортосунда мушташ чыгып кеткенин аныкташкан.

Аталган факт боюнча Кылмыш-жаза кодексинин 280-беренесине (Бейбаштык) ылайык кылмыш иши козголгон. Шектүү катары 1999-жылы туулган Р.С., 2000 жылы туулган Ж.Х., 2004-жылы туулган Г.Р. жана 2002-жылы туулган Т.С. аттуу жарандар кармалып, убактылуу кармоочу жайга киргизилген.

Свердлов райондук сотунун чечими менен алар Бишкек шаарынын №1 тергөө абагына 2 айга камакка алынды.

Автор: Айпери Бакталбек кызы
Фото: Бишкек ШИИББ