Зеленский Орусиянын бардык аймактарына жетүүчү ракеталары бар экендигин айтты

Украинанын президенти Владимир Зеленский Даниянын премьер-министри менен өткөргөн пресс-конференцияда Украина азыр алыскы аралыкка атуучу куралдарга ээ экенин жана аны колдонууга ниеттенип жатканын айтты.

Бирок ал Брянсктын жанындагы орус ок-дары сакталган кампага кол салуу ATACMS тарабынан жасалганын ырастаган жок.

"Азыр Украинанын узак аралыкка учуруучу куралдары бар. Өзүбүздүн өндүрүштүн узак аралыкка учуучу дрондору, бизде бир нече "Нептун" куралы да бар. Азыр бизде ATACMS бар. Биз мунун баарын колдонобуз”, - деди Зеленский Даниянын премьер-министри Метте Фредриксен менен биргелешкен маалымат жыйынында.

Эске салсак, 17-ноябрда америкалык басылмалар АКШ президенти Жо Байден Украинага Орусиядагы буталарга каршы ATACMS ракеталарын колдонууга уруксат бергенин жазышкан.