Министрлик Украинадагы кыргызстандыктарга ал өлкөдөн чыгып кетүүнү сунуштады

Тышкы иштер министрлиги Киевге учкучсуз учуучу учактарды колдонуу менен массалык сокку жасалганын белгилеп, ал жерде жүргөн кыргызстандыктардан Украинанын аймагынан чыгып кетүүнү сунуштады.

"20-ноябрында Киев облусунун аймагы боюнча учкучсуз учуучу учактарды колдонуу менен массалык сокку жасалган.

Кыргыз Республикасынын Тышкы иштер министрлиги кайрадан Кыргыз жарандарына жеке коопсуздук чараларын күчөтүүнү жана зарыл болгон учурда кырдаал толук турукташканга чейин Украинанын аймагынан чыгып кетүүнү сунуштайт.

Кыргыз Республикасынын Украинадагы Элчилигинин ыкчам байланыш телефону аркылуу Украинада жүргөн Кыргыз жарандары зарыл болгон учурларда жардам же консультация алуу үчүн кайрыла алышат: +38 068 139 67 92, +38 044 237 03 48", - деп билдиришти министрликтен.

Ушундай эле кайрылууну коңшу Казакстан дагы Украинада жүргөн жарандарына жолдоду.

Автор: Азат Бейшенбеков