Бишкек мэриясы жаңы автобустун катышуусундагы кырсык боюнча билдирүү жасады

Бишкек шаарынын мэриясы бүгүн, 26-ноябрда шаардын батыш тарабында жаңы автобустун катышуусундагы кырсык боюнча билдирүү жасады.

Мэрия билдирүүсүндө кырсыктан 8 адам жабыркаганын билдирди.

"Бүгүн, 26-ноябрда Барпы Алыкулов жана Жайыл баатыр көчөлөрүнүн кесилишинде (ЖЭБ-2 району) чыгыштан батышты көздөй катуу ылдамдыкта келе жаткан Мерседес-Бенц жеңил унаасы №23 муниципалдык автобус менен сүзүшкөн.

Кырсыктан 8 адам жабыркаган, алардын 5и автобустун жүргүнчүлөрү, 3 жүргүнчү жеңил унаада болгон. Алар ооруканага жеткирилди.

Окуя болгон жерде Бишкек шаардык ички иштер башкармалыгынын ЖКККБ кызматкерлери иштеп жатат. Алдын ала маалыматтар боюнча, жеңил унаанын айдоочусу жол эрежесин бузган", - деп билдиришти мэриядан.

Буга чейин кырсыктын видеосу тараган. Анда автобус менен жеңил унаа сүзүшүп, автобус жолдон чыгып кеткен.

Автор: Азат Бейшенбеков