Жо Байден атаандашы Трамптын инаугурациясына байланыштуу убада берди

АКШнын президенти Жо Байден президенттик шайлоодо жеңишке жеткен Дональд Трамптын инаугурациясына катышат. Бул тууралуу Ак үйдүн басма сөз катчысынын орун басары Эндрю Бейтс журналисттерге билдирди.

"Президент шайлоодо ким жеңсе, анын инаугурациясына катышам деп убада кылган. Ал биринчи айым экөө ошол убадасын аткарышат. Ал муну биздин демократиялык баалуулуктарга берилгендиктен жана элдин тандоосун урматтай турганынан жасап жатат", - деген ал.

Дональд Трамп 5-ноябрда өткөн АКШдагы президенттик шайлоодо жеңишке жеткен. Анын инаугурациясы 2025-жылдын 20-январында өтөт.

Белгилей кетсек, Дональд Трамп Байдендин 2021-жылдын январында болгон инаугурациясына катышкан эмес.

Автор: Азат Бейшенбеков