Окуучулар үчүн 285 миңден ашык окуу китеби басылып чыкты

Өлкөдө мектеп окуучулары үчүн 285 630 нускада окуу китеби басылып чыкты. Бул тууралуу Билим берүү жана илим министрлиги билдирди.

Маалыматка ылайык, кыргыз тилдүү класстар үчүн 7-8-класстын окуучуларына Русский язык китептери жарык көрдү. Ошондой эле окутуу орус тилинде жүргүзүлгөн 7-8-класстар үчүн Кыргыз тили, 7-класстар үчүн Русский язык китептери чыккан.

Эске сала кетсек, 2024-жылы республикалык бюджеттен билим берүү уюмдарын окуу китептери менен камсыздоого 152 миллион сом каралган. Бул каражаттын эсебинен 2024-2025-окуу жылына карата 428 960 нускада жаңы окуу китептери жана мугалимдер үчүн методикалык колдонмолор басылып чыккан. Мектептерди жаңы окуу китептери менен камсыздоо максатында 2024-жылы республикалык бюджеттен 90 миллион сом кошумча бөлүнгөн.

Автор: Айжанар Рыспек кызы
Фото: Билим берүү жана илим министрлиги