Байдендин администрациясы Украинага дагы 725 миллион долларлык курал бөлөт

АКШ президенти Жо Байдендин администрациясы Украина үчүн дагы 725 миллион долларлык танкка каршы куралдарды даярдап жатат. Бул тууралуу Reuters агенттиги Байдендин администрациясына шилтеме берип жазып чыкты.

Жаңы пакетте миналар, дрондор, Стрингер ракеталары жана HIMARS ракеталык системалары үчүн ок-дарылар бар. Украинага бөлүнүп берүүчү куралдар АКШнын кампаларынан бөлүнөт.

Байдендин администрациясы 2025-жылдын январында АКШнын шайланган президенти Дональд Трамптын инаугурациясына чейин Украинанын позициясын бекемдөө үчүн бардыгын жасоого ниеттенип жатканын бир нече жолу баса белгилеген. Бир күн мурда АКШнын мамлекеттик катчысы Энтони Блинкен да Кошмо Штаттары Украинага 2025-жылы согуштук аракеттерди улантуу же “күч позициясынан” сүйлөшүүлөрдү жүргүзүү үчүн зарыл болгон нерселердин баарын камсыздай турганын айткан. Буга чейин Трамп Украинадагы согушту “24 сааттын ичинде” бүтүрүүнү убада кылган.