Ысык-Көлдүн Темир айылынын жаштары майыптыгы бар балдардын ата-энесине жаңы үй куруп берди

Ысык-Көл районунун Темир айылынын жаштарынын демөөрчүлүгү менен айылдагы оорулуу беш баласы бар үй-бүлөгө жаңы төрт бөлмөлүү үй курулуп берилди. Бул тууралуу бүгүн, 12-декабрда Муфтияттын басма сөз кызматынан билдирди.

Маалыматка ылайык, үй жашоого керектүү эмеректер, кир жуучу машина жана башка бардык шарттары менен толук жабдылган. Кайрымдуулук иш-чарасы Садыр-Аке айыл өкмөтүнүн жооптуу имамы Эрнис Медетовдун демилгеси менен уюштурулган.

Ысык-Көл районунун баш имам-хатиби Максат Сейталиев жаштардын бул берешен демилгесине ыраазычылыгын билдирди.

"Бул биздин райондо муктаждар үчүн курулуп берилген бешинчи үй болду. Оорулуу балдары бар үй-бүлөлөргө кол сунган жаштарыбызга Алла ыраазы болсун!" – деди ал.

Автор: Бек Оморбеков