Жылнаама. 10-январь: Мындан 1 жыл мурун К.Ташиев, С.Жапаров жана Т.Мамытов боюнча сот иши башталган

* 1955-жылыМурдагы Энергетика жана өнөр жай министри Автандил Калмамбетов Ысык-Көл областында туулган. Билими жогорку. 1973-жылы Фрунзе Политехникалык институтуна электр станциялары, тармактар жана системдер адистигине тапшырып, 1978-жылы аяктаган. Ал эми 1995 -жылы Голландиядагы Лейден университетинин эл аралык энергетика укуктары институтун бүтүрүп келген.

Калмамбетов 2010-2012-жылдары КРнын Энергетика министринин орун басары (аталган кызматка 2011-ж. апрелде жана 2012-ж. мартта кайра дайындалган) болуп эмгектенип жүрүп, 2012-жылдын 6-сентябрынан 2013-жылдын 22-апрелине чейин КРнын Энергетика жана өнөр жай министри болуп эмгектенген.

* 1908-жылы Мамлекеттик жана партиялык ишмер Төрөбай Кулатов төрөлгөн. Мамлекеттик жана партиялык ишмер Төрөбай Кулатов Ноокат районунун, Кызыл-Булак айылында туулган. 9 жашынан 16 жашка чейин байларга жалданып иштеген. Кийин темир жол жумушчусу, Кызыл-Кыя "Жал" шахтасында забойщик, шахта комитеттеринин төрагасы, көмүрчүлөр союзунун шахта комитетинин төрагасы болуп эмгектенген.

Ош облустук партиялык мектепти бүтүрүп, "Жал" шахтасында парторг, Кызыл-Кыя шааркомунун төрагасынын орун басары, "Кыргыз көмүр" трестинин башкаруучусунун орун басары, 33 жыл бою Кыргыз ССР Жогорку Советинин Президиумунун төрагасы болуп иштеген. КПССтин съезддеринин делегаты, СССР Жогорку Советине, Кыргыз ССР Жогорку Советине үзүлбөстөн депутат болуп шайланган. 5 Ленин ордени, Октябрь революциясы ордени, башка 4 орден жана медалдар менен сыйланган. 1978-жылы 70 жаш курагында дүйнөдөн кайткан.

* 2013-жылы Бишкекте депутаттар Камчыбек Ташиев, Садыр Жапаров, Талант Мамытов боюнча сот иши башталган. Аталган 3 депутат 2012-жылдын 3-октябрында Бишкектин борбордук аянтында “Кумтөр” алтын кени боюнча митинг уюштурган. Жолугушуу аяктагандан кийин К.Ташиев чогулгандарды бийликти басып алууга үндөп, жан-жөкөрлөрү менен Ак үйдүн тосмосун ашып кирген.

2013-жылдын 6-августунда Жогорку Сот "ата журтчу" депутаттар Камчыбек Ташиев, Садыр Жапаров жана Талант Мамытовго карата козголгон кылмыш иши боюнча чечим чыгарган. Судья Жакып Абдрахмановдун төрагалыгынын астындагы соттук курам Бишкек шаардык сотунун депутаттарды актаган чечимин толугу менен жокко чыгарып, Садыр Жапаров менен Камчыбек Ташиевге карата Биринчи Май райондук сотунун өкүмүн өзгөртүп, Кылмыш-жаза кодексинин 30 жана 295-беренелери боюнча күнөөлүү деп тапкан. Аларга райондук сот чыгарган 1 жыл 6 айлык жаза өтөө мөөнөтү кыскартылып, 1 жыл 5 ай деп белгилеген. Ал эми Талант Мамытовдун 1 жылдык жаза өтөө мөөнөтү өзгөртүүсүз калган.

Жылнаама толугу менен бул жерде...

Автор: Автандил Добулбеков