Илон Маск Ак үйдөн кетиши мүмкүн

Америкалык миллиардер, SpaceX компаниясынын негиздөөчүсү Илон Маск жакынкы убакта мамлекеттик кызматтан кетип, кайрадан өзүнүн компанияларын башкарууга кайтып келиши мүмкүн. Бул тууралуу АКШнын президенти Дональд Трамп билдиргенин чет элдик маалымат булактары жазышты.

"Менимче, ал укмуштуудай адам, бирок ошол эле учурда чоң компанияны башкарууга тийиш. Бир кезде ага кайтууга туура келет. Ал өзү да ушуну каалап жатат. Мен аны мүмкүн болушунча кармоого аракет кылам", – деген Трамп.

Трамптын администрациясынын атайын кеңешчиси болуп дайындалган Маск АКШнын федералдык бюджетинин тартыштыгын азайтуу боюнча иштерди жетектеп жатат. Ал сунуштаган чыгымдарды кыскартуу чаралары, анын ичинде мамлекеттик мекемелердеги кызматкерлердин санын азайтуу, айрымдар тарабынан колдоого алынса, кээ бирөөлөр тарабынан сынга алынууда.

Масктын мамлекеттик кызматтагы мөөнөтү 130 күндү түзүп, май айынын аягында аяктайт. Ак үйдүн кызматкерлеринин бири буга чейин Маск Трамп менен ишин улантышы мүмкүн деп болжолдогон.

Белгилей кетсек, Дональд Трамп Илон Маск менен Вивек Рамасвами 2024-жылдын ноябрь айында АКШ өкмөтүнүн натыйжалуулугун жогорулатуу боюнча министрликти жетектей турганын жарыялаган.

Автор: Айжанар Рыспек кызы
Фото: интернеттен алынды