Намангандагы велоспорт мелдешинде кыргызстандык команда медаль утту

Наманган шаарында өтүп жаткан "Silk Way Namangan" аттуу велоспорт мелдешинин биринчи күнүндө кыргызстандык велоспортчулар байгелүү орунга ээ болушту. Бул тууралуу бүгүн, 8-майда Дене тарбия жана спорт департаменти билдирди.

Маалыматка ылайык, Кыргызстандын атынан чыккан TOPVELO-ART командасы 1 чакырымдык командалык спринт (Team Sprint) түрүндө финалга чыгып, алтын медаль үчүн Казакстандын велоспортчулары менен ат салышты.

Жыйынтыктоочу айлампада спортчуларыбыз болгону 50 миллисекунд айырма менен экинчи орунду ээлешти.

Жыйынтык төмөнкүдөй болду:

1-орун — 1 мүнөт 1 секунд 750 миллисекунд – Казакстандын Олимпиадалык даярдык борбору
2-орун — 1 мүнөт 1 секунд 800 миллисекунд – Кыргызстандын TOPVELO-ART командасы
3-орун — 1 мүнөт 4 секунд 145 миллисекунд – Казакстандын улуттук курама командасы.