Кылмыштуу топту каржылаган деген шек менен Талас Бегалиев жана дагы эки жаран кармалды

Маркум Камчы Көлбаевдин уюшкан кылмыштуу тобун каржылаган жана опузалап акча талап кылган деп кылмыштуу топтун мүчөлөрү кармалышты. Бул тууралуу бүгүн, 19-майда УКМКнын маалымат борбору билдирди.

Маалымдалгандай, кармалган шектүүлөр "Братский круг" эл аралык кылмыштуу тобунун курамына кирген.

Б.Т. - ИИМ системинде жетекчилик кызматтарды аркалаган, кылмыш чөйрөсүндө уюшкан кылмыштуу топтун лидери Ч.Жумагуловдун (Дөө Чынгыз) өкүл атасы катары белгилүү;
Т.Ч. - Ч. Жумагулов менен жана "мыйзамдагы ууру" аталган У. Токтосунов (Сакал) менен тыгыз байланышы бар;
Т.А. - Олимпиадалык резервдеги балдар-өспүрүмдөр спорт мектебинин биринин директору кызматын ээлеген (Көлбаевге жакын, жаш спортчуларды кылмыштуу чөйрөгө тартуу менен алектенген, анын спорт боюнча куратору.

Белгиленгендей, уюшкан кылмыштуу топтун лидерлери менен Б.Т. сүйлөшүп алып, бир жарандын Чүй облусунун Аламүдүн районуна караштуу Кара-Жыгач айылында жайгашкан 2 миллион сомдук жерин тартып алган. Кийин туугандарына каттап берген. Мындан тышкары, үч шектүү опузалап коркутуу аркылуу башка жарандан 300 миң доллар алып, Көлбаевге алып барып бергендиги кошумчаланган. Бул кылмыштар боюнча жарандар күч түзүмдөрүнө кайрылган.

Ошондой эле Б.Т. кызмат учурунда уюшкан кылмыштуу топтун мүчөлөрүн калкалап тургандыгы ачыкталганы айтылды.

Топтолгон материалдардын негизинде шектүүлөр 16-майда кармалып, камакка алынды.

Айрым маалымат каражаттары кармалгандар Көк бөрү федерациясынын мурдагы президенти Талас Бегалиев, Спорттун олимпиадалык эмес түрлөрү боюнча дирекциясынын мурунку директору Асеин Төрөгелдиев жана Чыңгыз Таалайбек уулу экендигин жазышууда.

Автор: Замира Ниязбекова