Өлкөдөгү мектептерде бүткүл дүйнөлүк азык-түлүк күнүнө арналган экологиялык марафон өтөт

13-24-октябрда Кыргызстандын төрт мектебинде Бүткүл дүйнөлүк азык-түлүк күнүнө арналган “Жашыл ачылыштар марафону” өтөт. Бул тууралуу Агартуу министрлигинен билдиришти.

Быйыл бул майрам “Азык-түлүктүн сапатын жакшыртуу жана бакубат келечек үчүн колмо-кол биргеликте” деген ураандын астында белгиленет.

Маалым болгондой, иш-чараны Агартуу министрлиги менен БУУнун Дүйнөлүк азык-түлүк программасы биргелешип уюштурууда.

Мекемеден билдиришкендей, эки жуманын ичинде 4-класстардын окуучулары практикалык сабактар аркылуу тамак-аштын “бакчадан табакка чейинки” жолун изилдеп чыгышат: үрөн сээп, өсүмдүктөргө кам көрүп, суунун, жердин жана тамак-аштын баалуулугун түшүнүшөт. Ошондой эле күнүмдүк адаттардын жаратылышка тийгизген таасирин билишет.

Марафондун жыйынтыгында “Бакчадан табакка чейин” аттуу фестиваль өтүп, анда окуучуларды кызыктуу квесттер, мастер-класстар, театрлаштырылган оюн-зоок жана “Жашыл планета” деп аталган жамааттык арт-объектти жаратуу күтөт.

Иш-чара төмөнкү мектептерде өткөрүлөт:

● Кожомкулов атындагы жалпы билим берүүчү орто мектеп (Чүй облусу, Панфилов району)

● Айтматов атындагы №69 жалпы билим берүүчү орто мектеп (Ош облусу, Кара-Суу району)

● Нургазиев атындагы №29 жалпы билим берүүчү орто мектеп (Жалал-Абад облусу, Токтогул району)

● Эшенаалы уулу Сейитбек атындагы жалпы билим берүүчү орто мектеп (Талас облусу, Айтматов району)

Автор: Ширин Марат кызы