Чүй облусундагы "Чуңкурчак" тоо-лыжа базасына жакын аймакта катталган жол кырсыгы адам өмүрүн алып кетти. Бул тууралуу Чүй облусунун Жол кыймылынын коопсуздугун камсыздоо башкармалыгы маалымдады.
Маалыматка ылайык, BMW X7 үлгүсүндөгү унаанын айдоочусу ашуу сыяктуу жолдо рулду башкара албай калган. Натыйжада унаа жолдон чыгып кетип, капчыгайга кулап түшкөн.
Кырсыктын кесепетинен жети жаштагы бала окуя болгон жерде каза тапты. Ал эми унааны башкарган айдоочу оор абалда ооруканага жеткирилип, медициналык жардам көрсөтүлүүдө.
Учурда жол кырсыгынын бардык жагдайлары такталып, тиешелүү текшерүү иштери жүргүзүлүп жатат.