Венесуэланын Гуайкайпуро шаарчасында өткөн массалык баш аламандыкта 25 жаштагы кош бойлуу аялга ок тийип, каза тапты.
Маалыматка ылайык, 5 айлык боюнда бар айым ооруканага бара жаткан. Ал митингчилердин айынан токтоп турган автобустан түшүп, жөө барууга аракет кылган. Ошол учурда ага ок тийген. Азыркы тапта полиция кызматкерлери мерт болгон айымдын өлүмү боюнча тергөө амалдарын жүргүзүшүүдө. Венесуэладагы баш аламандыкта каза болондордун саны 36га жетти. 22-мартта 26 жаштагы активисттердин бири Архенис Эрнандести мотоцикл сүзүп көз жумду. Мотоциклдин айдоочусу митингчилер орноткон баррикададан өтүп жатканда митингдин катышуучусун сүзүп кеткен.
Ошондой эле Мерида шаарында белгисиз адамдар тарабынан Хесус Орландо Лабрадор өлтүрүлгөн. Айрым маалыматтарда "атып кеткен адамдар өкмөттүн жактоочулары" деген божомолдор айтылган.
Мындан сырткары 21-марттагы кагылышууда 31 жаштагы автобустун айдоочусу атылган. Февраль айынын орто ченинде аталган өлкөнүн студенттери нааразылык акциясына чыгышкан. Акыркы маалыматтар боюнча, полиция менен митингчилердин кагылышуусунда көздөн жаш чыгарчу газ колдонулуп, таштар ыргытылууда. 20 миңге чукул адам катышкан кагылышууда 9га жакын адам камакка алынган. Бул тууралуу 25-мартта чет элдик басылмалар жазып чыгышты.
Эске салсак, Венесуэладагы
массалык нааразылык акциялары 2014-жылы 4-февралда башталган. Алгач Тачира штатында өтүп, андан соң башка шаарларга жайылган нааразылык акциялары Меридага жана өлкөнүн
борбору Каракас шаарына жеткен. Студенттер
окуу жайларындагы коопсуздук тийиштүү деңгээлде
эмес экенин айтып митингге чыгышкан. Кийинчерээк экономикалык каатчылыкка каршы
акциялар башталып, митингчилер өлкөдөгү кырдаал боюнча бийлик өкүлдөрүн
күнөөлөшкөн. Бир катар митингчилер күч органдары тарабынан камакка алынган.
