Азербайжандык саясатчы “Жириновскийдин кулагын жулам” деп билдирүү жасады

Азербайжандагы “Современный Мусават” партиясынын лидери Хафиз Гаджиев орусиялык депутат Владимир Жириновскийдин кулагын кесип аларын айтып билдирүү жасады. Маалыматты бүгүн, 4-апрелде чет элдик ММКлар жарыялашты.

Гаджиевдин мындай билдирүү жасашына Жириновскийдин Азербайжанды шылдыңдоо иретинде айткан сөзү себеп болуптур.

“Бул шылдыңдоосу үчүн жеке мен анын кулагын жулам. Эгерде ким Жириновскийге татыктуу жооп бере албаса, ал да ошого окшош”,- дейт Гаджиев.

Айта кетсек, Жириновский жакында Мамлекеттик Думанын жыйынында Азербайжан тууралуу сөз сүйлөгөн. Ал Азербайжан деген сөздү чечмелеп берген эле.

“Азербайжан деген эмне? Мен силерге орусчага которуп берем. Азер – бул Хезер деңизи же Каспий деңизи, баджа – край. Башкача айтканда, бул – Каспий деңизинин жээгинде жашаган эл, каспийликтер. Бул эмне, улутпу? Булар ошол жерде жашаган жарандар”,- деген эле Жириновский.

Автор: Автандил Добулбеков