Айымдарды сойкулукка тарткандарды 8 жылга камоого жол ача турган мыйзам долбоору 3-окууда добуш берүүгө жөнөтүлдү

Парламентте бүгүн, 23-апрелде айымдарды сойкулук ишке тарткан жарандардын жоопкерчилигин күчөтө турган мыйзам долбоору талкууланып, 3-окууда добуш берүүгө жөнөтүлдү. Мыйзам долбооруна ылайык, күч колдонуу же коркутуу, опузалоо, мүлкүн жок кылуу же алдоо жолу менен айымдарды сойкулукка тарткандар 3 жылдан 5 жылга чейин эркинен ажыратылат. Ал эми мындай иштер уюшкан кылмыштуу топ тарабынан жасалса, алардын мүлкү конфискацияланып, өздөрү 5 жылдан 8 жылга чейин кесилмекчи. Демилгечи депутат Кожобек Рыспаев мыйзамдын таасири болот деп ишенет. “Жакында интимдик маанайдагы жарнактар боюнча мыйзам көтөрүлдү эле, телеканалдардан уяттуу маалыматтар чыкпай калды” деп мисал келтирди депутат.

Автор: Автандил Добулбеков